Nizami Kino Mərkəzində rejissor Ramil Ağasiyevin çoxdan gözlənilən "Arzuların ardınca" dramatik filminin təqdimatı keçirilib. Gecədə baş qəhrəmanlar Ziya Ağa, Zarina Qurbanova, Vaqif Əsədov, Rasim Cəfər, Aynur Hüseyn və Flora Hüseynova olmaqla bütün çəkiliş qrupu, eləcə də yaradıcı qrupu dəstəkləmək üçün gəlmiş tanınmış simalar və KİV nümayəndələri iştirak ediblər.

İlk olaraq jurnalistlər qarşısına filmin rejissoru Ramil Ağasıyev çıxaraq tamaşaçılara keyfiyyətli məhsul təqdim etmək üçün əlindən gələni əsirgəmədiklərini bildiri. "Əvvəlcədən heç nə söyləmək istəmirəm, çünki siz hələ filmə tamaşa etməmisiniz. Yalnız onu deyə bilərəm ki, bu ilk müasir Azərbaycan melodramıdır. Düşünürəm ki, müasir filmlərimizdə məhz bu janr çatışmırdı. Ümid edirəm ki, bizim işimizi yüksək qiymətləndirəcəksiniz", - deyə R.Ağasıyev qeyd edib.  

Premyerada filmin rəsmi saundtreki olan "Getmə-getmə"ni ifa etmiş əməkdar artist Sevda Ələkbərzadə də iştirak edib. Bu mahnı 2009-cu ildə məxsusi olaraq "Sevdalı dünya" albomu üçün yazılmışdı.

Melodram xərçəng xəstəsi olan gəncin həyatının son aylarından bəhs edir. Bütün həyatını tənhalıqda keçirən və sevginin nə olduğunu bilməyən Kamil mövcudluğunun mənasını yalnız işləməkdə görür. Ölümcül diaqnoz onun bütün taleyi üzərində xətt çəkir, lakin Kamilin heç ağlına belə gəlməzdi ki, son bir neçə ay onun üçün indiyədək yaşadığı 30 illik ömürdən daha əziz olacaq. Xəstəxanada Arzu ilə tanış olan Kamil indiyədək məhəbbət kimi qəbul etdiyi hisslərin hamısının yalan olduğunu anlayır. O Arzunu özünün ömür ağacının sonuncu yarpağı kimi görür. Lakin onları birləşdirən yalnız bir-birlərinə qarşı olan hissləri deyil. Həm Kamilin, həm də Arzunun böyük yaşamaq həvəsi var. Onlar xəstəliklərini unudub xöşbəxt olmağa çalışırlar. Onların ölümcül xəstəlikdən daha güclü ümumi marağı var...

Bu gündən etibarən "Arzuların ardınca" melodramı paytaxtın bütün kinoteatrlarında nümayiş olunur.