Əvvəlki iki filmdə ABŞ prezidentini xilas etmiş xüsusi xidmət əməkdaşı Mayk Benninqin obrazını yenidən Cerard Batler canlandıracaq. Üçüncü filmdə terrorçuların hədəfi Benninq özü olacaq. Lalin bu dəfə də prezidentsiz ötüşməyəck, çünki "Mələk" ölkənin icra hakimiyyətinin başçısının təyyarəsinin kod adıdır, filmdəki hadisələr isə Vaşinqtonda cərəyan edir.

"Mələyin süqutu" ilə yenə də Millenium Films məşğul olacaq. Prodüserlər Batler özü, Alan Siqel, Mark Qill, Con Tompson və Mett Otuldur. İcraçı prodüserlər qismində Avi Lerner, Trevor Şort və Kristin Otal iştirak edəcəklər. Ssenarini franşizin daimi müəllifləri olan Kreyton Rotenberqer və Ketrin Benedikt yazacaq. Rejissor isə hələlik müəyyənləşməyib.

"Olimpin süqutu" prokata 2013-cü ildə çıxıb və 161 mln dollar (təqribən 100 mln dollar ABŞ-da əldə olunub) qazanc gətirib. "Londonun süqutu" sikvelinin relizi 2016-cı ildə baş tutub. Filmin davamı ABŞ-da daha az qazanc əldə etsə də (60 mln dollar), dünya üzrə gəliri (195 mln dollar) gözlənildiyindən çox olub.

"Mələyin süqutu"nun çəkilişləri 2017-ci ilin birinci yarısında başlanacaq.