Son vaxtlar daha çox adlı-sanlı filmmeyker müasir kino industriyasının ünvanına tənqidlər səsləndirir. Deadline-a müsahibəsində bahalı blokbasterin xeyri və ya zərəri barədə fikirlərini Oskar mükafatlı Mel Qibson bölüşüb.

Bu günlərdə keçirilən 73-cü Venesiya kinofestivalında Qibson özünün yeni rejissor layihəsini - 10 dəqiqə ayaqüstə alqışa layiq görülmüş "Vicdan üzündən" filmini təqdim edib. Melin sözlərinə görə, onun Avstraliyada hərbi dram çəkməsi üçün əksər Hollivud filmlərinin çəkilişinə sərf olunan büdcədən qat-qat az - cəmi $40 mln lazım gəlib.

"Mən düşünmürəm ki, müasir blokbasterlər bu qədər baha olmalıdır. Yüz milyonlarla dollarlıq filmlər məndə çaşqınlıq yaradıb.Mənim fikrimcə, onların yaradılması adətən əbəs yerə pul xərcləməkdən başqa bir şey deyil. Bəlkə də mən özüm yaşıl ekranın fonunda hansısa film çəkmiş olsa idim, vəziyyəti başqa cür dəyərləndirərdim. Lakin hazırda mən hesab edirəm ki, bu cür blokbasterləri daha ucuz çəkmək olar. Vergiləri və prokat edənlərə çatan vəsaiti ödədikdən sonra istehsalına 200 mln dollar sərf olunan filmi rentabelli necə etmək olar sualının cavabını bilmirəm. Götürək "Betmen Supermenə qarşı: Ədalətin şəfəqində" filmini. Studiya onun yalnız çəkilişinə 250 mln dollar xərcləndiyini söyləyir. Lakin film çıxdıqda biz aşağı keyfiyyətli məhsulun şahidi olduq", - deyə Mel Qibson bildirib.

"Mənim superqəhrəman janrına azacıq da olsa marağım yoxdur. Gerçək və komiks superqəhrəmanları arasında fərqin nədə olduğunu bilirsiniz? Əsl superqəhrəmanlar triko geyinmirlər. Mən, studiyaların kinokomikslərə ağlasığmaz pullar xərclədiklərinin səbəbini bilmirəm. Görünür, spandeksdən kostyumlar indiki dövrdə ucuz başa gəlmir", - deyə Mel Qibson əlavə edib.